SHIM BYNTA KA NIAM UNITARIAN HA KA JINGIALANG PUJA

SHIM BYNTA KA NIAM UNITARIAN HA KA JINGIALANG PUJA
- da u Editor.

Ha ka jingiakynduh ba la ai kyrteng" Get-Together of Harmony" ba la pynlong da ka Central Puja Committee, Shillong, ha ka 12 tarik u October, 2010,ha shuwa ban sdang ka Durga Puja, la khot sngewbha ia u Rev.P.G.Marbaniang bad mihkhmat na ka liang jong ka Niam Unitarian, hapdeng ka jingdon jong ki kynhun niam bapher.Kane ka jingiakynduh ka iahap ruh ka jingrakhe burom ia ka jingdap 50 snem jong ka Rajasthani Durga Puja Samiti, bad ia kane ka function la pdiang da kane ka kynhun.U Kongsan, u Lat jong ka Jylla Meghalaya, u Shri R.S Mooshahary, u laban halor ka jingdonkam ia ka niam bakhlem jingknia, hynrei kaba mane beit tang ia U Blei khlem pynthut ne pynjot ia ki para jingthaw, namar baroh ngi longtrai ia kane ka pyrthei.U la pynkynmaw ba ka jingiaishah niam ka long kaba donkam haduh katta katta, khamtam ha ki por mynta.U la iathuh ruh ba ka kyntien"Kris" ha u Jisu Kris ka la mih na ka kyntien"Krish" jong u blei Krishna. Kiwei pat ki riewpawkhmat kiba la ai jingkren ki long u Deputy Chief Minister, u Bah Bindo M. Lanong, u Dr. D.D.Lapang, u Minister A.T.Mondal.La pyni ruh ia ka jingshad bad jingrwai tynrai da ki khynnah bad riew kynthei Rajasthani, bad ki khynnah skul baduk jong ka skul Tibet ha Shillong ki la tem bad la put ia ki jingrwai ieid ri ba pynmyllung.

Ha shuwa kane, la pynkup ia baroh ki rangbah niam bad ki riewpawkhmat da artylli ki shawl Hindu. U Rev. Marbaniang u la tbeh ding ia kawei na ki sharak jong ka Puja bad u la ialam ia baroh ha ka jingduwai ba la pynkhreh kyrpang da i Padmashri Kong Patricia Mukhim shaphang ka jingiatylli lang ki jaid niam baroh, bad ka jingshongsuk shongshngain jong baroh ki jaidbynriew bapher. La sam paidbah ruh ia ka Golden Jubilee souvenir ba la pynlait paidbah da u Lat.